A dr Voogilfluuglinia
singid siba schneeawiissi Schwään
übar mis Huus
ufam Fluug in Süüda
singid Säaga
bringid Freada
ear schneeawiissa Schwään
vum Noardan in Süüda
vum Weschtan in Oschta
bringid Freada
singid vu Kraankat
Soargan und schtäarba
schneawiissi Schwään
singid Läaba
singid Säaga
bringid Freada
Dämmarschtunda
Si ischt fascht 97gi gsii wo s gschtoarban ischt im Juli 2001
üsari Tanta Fiina
leedig roati Hoor
s Läaba lang ir Fabrik gschaffat
um nünt
si hett gäan an Maa khaa
und Kiand
abar doazmool mit roata Hoor
ku Schooss
blibscht hoka bim Kilbitaanz
abar im Aaltarshaim
haiaiai bis in Moargan iachi taanzat
ammana Fäascht
jawool
di roata Hoor siand iaz jo wiiss
schneewiiss wi andari oo
si häat s Läaba ggnossa
earscht räacht
gäan gsunga
regilmäässig a Glääsli Wii
ebs äacht no hundarti wöar
ammana Taag häats gseet
as langat
iaz bini müad
ischt im Bett pleaba
häat nümma ggäassa nümma trunka
t Ooga zuan und ufa Toad ggwaartat
däar ischt nüd gad glai koo
singa
häat Pfiina gseet
singa
iannari aalta Liadar
hommar mittar gsunga
Liabi Load Frööd und Toad
alls hommar mittar gsunga
mänga Schtrooffa
mit vollar Schtimm
klaar und tütlig
us vollam Häarz häat Pfiina gsunga
Köarpar und Gaischt siand langsam varlöscht
wi a Kearzaflämmli
s Ggmüat häat no häall uusaklunga
bisas dar Toad khöart
und Pfiina it Aarma ggnoo häat
Gränzschtuua
ir Meatti
vum aalta Rii
schtoot
an Gränzschtuua
ufamana
Schtuuabett
Als Kiand
siammar
uufikläattarat
aachigjukt
uufi aachi uufi aachi
is Inland gjukt
is Ussland gjukt
uuni Pass
Gschichtabömm
Iaadi häat
iannari
Gschicht
doar Schichta
vu iannarar Moattar
sinnar Gschicht
und iannaram Vattar
sinnar Gschicht
und doar
iannaran Eltara
sina Gschichta
woarzlid
I ho
Bim Papa Kuschtar ir Kuchi khokat
voar iam uss a Holzkischta
ufar Holzkischtan an umkeearti Holzhäardiisapfanna
am langa iisaga Schtiil vur Pfanna
häat ar dar goldig Töargga ggraschplat ratsch ratsch ratsch
Köannli siand it Kischta gschpikt
dar läär Rapp häatar it Zuana gwoarffa
dian häatar im Wiantar zum aafüüra ggnoo
ii als klänns Möatali darnäabat khöklat
ir Kafìmüüli uf da Knüüna hani Töarggaköanli ggmaalat
schtundalang rundumm ioo iooioo
vu Zitt zu Zitt häat dar Papa Kuschtar gseet
i ho
all han i gfröögat
waa hoasst i ho
i ho
häat dar Papa Kuschtar gseet
und häat hööfali gglächlat
ammana Taag han i gseet
iaz woassis:
i ho hoasst joo
dar Papa Kuschtar häat hööfali gglächlat
ùnd häat gseet
i ho
Napoli
Am Meer
Mööfagschrööa
kun uanziga Voogil wo singt
bi nüd wägs da Vöögil koo
bi wägs dar Muusig doo
Rusalka
s Määrli vur Nixa und vum Prinz
wo nüd hond künna zämmakoo
dr Graaba zwüschat Läaban und Toad
ischt z tüüf
truurig schüüa s Liad an Moo
wo t Rusalka singt
la Luna höart s
blibt schtumm
am Himmil schtoo
Rii rundumm
rundumm Rii
ruuschat aanis varbii
laadat zum Baada
zum Loosan und Luagan ii
kunnt eewig
goot eewig
und ischt all doo
Rii rundumm
rundumm Rii
kunnt vu mächtiga Bäarg
macht is klii wi Zwäarg
loot is machtloas am Uufar schtoo
übar viar Brugga üübarigoo
Rii rundumm
rundumm Rii
ischt wi umarmat sii
vunnara Kraft
wo flüüsst
und Läaba bringt
mächtig doarsichtig singt
Uufrumma
kumm häascht di
räacht iiggrummat
im Läaba
iss schu widar Zitt
zum uusrumma
Aapassa
Aapassa
sì müsstat sì gad aapassa
tütsch läanna
schaffa wi meear
schmeka wi meear
täänka wi meear
jò meear
täätìd üüs
aapassa
As klokat
As klokat a fröndì Frou
A üsarì Tööar
Uuftùùa
Iiacha lòò
Ìt Ooga luaga
Sì häat an Namma
Ùnd o a Moattar
Ìm Hìmmìl
Ùanì wo vòar 2000 Jòòr
Säalbar
Flüchtlìng
Gsii ìscht
Am Taich
Frosch grüüa
ufam Searoasablatt
o grüüa
schüüa Frosch grüüa
Frosch grau
ufam gschpriggalatta Schtuua
o grau
schlau Frosch grau
Frosch schwarz
im schwadriga Schwappilschlamm
o schwarz
nüd aso schüüa wi Frosch grüüa
abar o schlau
wi Frosch grau
Berta Thurnherr, geboren 1946, lebt als Autorin und Erzählerin in Diepoldsau. 2018 wurde sie mit dem Rheintaler Kulturpreis Goldiga Törgga, 2021 mit dem Anerkennungspreis der Kulturstiftung des Kantons St. Gallen ausgezeichnet. Zahlreiche Veröffentlichungen, unter anderem «As wöart schù wööara, ma tuat wamma kaa» (Buch mit 2 CDs).
Beitragsbild © Ayse Yavas